کرپٹ تھے تو حکومت نے ہمیں گلے کیوں لگایا ، ریگولیٹری اتھارٹیز کو وزارتوں کے ماتحت کرنے کا فیصلہ سپریم کورٹ میں چیلنج کرینگے: خورشید شاہ

 اپوزیشن لیڈر خورشید شاہ نے کہا ہے ریگولیڑی ادارے وزارتوں کے ماتحت کرنے سے کرپشن کی داستانیں رقم ہوں گی ، کرپٹ تھے تو حکومت نے ہمیں گلے کیوں لگایا۔ وزیر داخلہ کی کارکردگی بہتر ہوتی تو کمشن سانحہ کوئٹہ پر ایسی رپورٹ کیوں دیتا۔ اسلام آباد میں خورشید شاہ نے میڈیا سے گفتگو کرتے ہوئے کہا ریگولیڑی اداروں کو وزارتوں کے ماتحت اس وقت کیا گیا جب کرپشن کی دھمال پڑی ہوئی ہے۔ انہوں نے کہا گیارہ سال جیلوں میں ڈال کر کیا ثابت کیا گیا، ہم اگر کرپٹ تھے تو حکومت نے ہمیں گلے کیوں لگایا۔ خورشید شاہ نے کہا وزیر داخلہ کی کارکردگی بہتر ہوتی تو کمشن سانحہ کوئٹہ پر ایسی رپورٹ کیوں دیتا۔ انہوں نے ریگولیٹری اتھارٹیز کو وزارتوں کے ماتحت کرنے کے فیصلے کو سپریم کورٹ میں چیلنج کرنے کا اعلان کرتے ہوئے کہا فیصلے کے خلاف پارلیمنٹ اور سڑکوں سمیت تمام فورمز استعمال کریں گے۔ اس سے وفاق کمزور ہو گا۔ انہوں نے کہا ایبٹ آباد کمشن کی رپورٹ منظر عام پر آنی چاہئے۔