3روزقبل اغوا ٹیکسی ڈرائیور کی نعش مناواں نالے سے برآمد

لاہور(نامہ نگار)ستوکتلہ کے علاقے سے 3روز قبل اغواء ہونے والے آن لائن ٹیکسی ڈرائیور کی تشدد زدہ سر میں گولی لگی نعش مناواں میں گندے نالے سے مل گئی ہے۔تفصیلات کے مطابق42 سالہ آن لائن ٹیکسی ڈرائیور اشفاق کو 2روز قبل اغواء کیا گیا تھا۔ تھانہ ستوکتلہ میں  اغواء کا مقدمہ درج تھا۔ گزشتہ روز اشفاق کی مناواں کے علاقے کریم گارڈن میں گندے نالے سے تشدد زدہ سر میں گولی لگی لاش مل گئی ہے۔اطلاع ملنے پر پولیس نے موقع پر پہنچ کرنعش قبضے میں لے کر پوسٹ مارٹم کے لئے مردہ خانے جمع کرا دی ہے اور تفتیش شروع کردی ہے۔مقتول کی شناخت 42 سالہ اشفاق کے نام سے ہوئی ہے جو آن لائن ٹیکسی ڈرائیور تھا ۔واضح رہے کہ مقتول کا موبائل اور لوکیشن آن ہونے کے باوجود پولیس مغوی کو بازیاب نہیں کروا سکی تھی۔