لاہور(سپورٹس ڈیسک )دس ماہ قبل خوفناک حادثے کا شکار ہونے والے امریکی گالفر ٹائیگر ووڈز نے صحتیابی کے بعد گالف کورس پر شاندار انداز میں واپسی کی ہے، پی این سی چیمپئن شپ میں گالفر اپنے 12 سالہ بیٹے چارلی کیساتھ شریک ہیں۔فلوریڈا میں ہونیوالی چیمپئن شپ میں فیملی کے ارکان جوڑی کی صورت میں کورس پر آئے، پہلے راؤنڈ میں سب کی توجہ کامرکز ٹائیگر ووڈز اور ان کے 12 سالہ بیٹے چارلی تھے۔36ہول کے ایونٹ میں باپ بیٹے نے یہ راؤنڈ دس انڈر کیساتھ مکمل کیا، وہ ٹاپ گالفر سے تین سٹروک پیچھے رہے۔ ٹائیگرز ووڈز کا کہنا تھا کہ یہ بہت اچھا ایونٹ رہا، سب کیلئے تفریح تھی، چارلی اور میں نے تھامس کے خاندان کیساتھ بہت اچھا دن گزارا۔ ٹائیگر ووڈز فروری میں کار حادثے میں شدید زخمی ہو گئے تھے۔ 15 بار کے میجر چیمپئن ٹائیگر ووڈز نے گالف کلب کے گرد گھومنے کیلئے ایک چھوٹی گاڑی کا استعمال کیا جبکہ چلتے ہوئے انہیں معمولی سی دشواری کا بھی سامنا تھا۔