بسوں کو انڈس ہائی وے پر حادثہ‘ وزیراعلیٰ کا افسوس‘ جاں بحق ہونے والوں میں 2 ائرفورس‘ ایک ایف سی اہلکار شامل‘ 25 زخمی

راجن پور‘ شیخوپور‘ سانگلہ ہل‘ ڈیرہ غازی خان‘ لاہور (نمائندہ خصوصی‘ نیوز رپورٹر‘ خصوصی رپورٹر‘ آئی این پی) انڈس ہائی وے پر دو مسافر بسوں میں خوفناک تصادم کے نتیجے میں 2 ائرفورس‘ ایک ایف سی اہلکار سمیت 8 افراد جاں بحق‘ سانگلہ میں دھند کے سبب موٹر سائیکل ٹرالی سے ٹکرا گئی‘ 3 بھائی زخمی ہو گئے۔ تفصیلات کے مطابق انڈس ہائی وے شاہ والی کے مقام پر 2 مسافر بسیں آپس میں ٹکرا گئیں‘ 8 افراد موقع پر جاں بحق اور 25 زخمی ہو گئے۔ شاہ والی اور روجھان ہسپتال میں منتقل کیا گیا ہے۔ ریسکیو ذرائع کا کہنا ہے کہ ایک مسافر بسں پشاور سے کراچی اور دوسری بس کوئٹہ سے راجن پور آ رہی تھی جبکہ یہ خوفناک حادثہ دھند کے باعث پیش آیا ہے۔ جاں بحق ہونے والے افراد میں محمد عمران، رفیق، غلام شبیر، حاجی رفیق، کفایت اﷲ سمیت دیگر افراد شامل ہیں۔ جبکہ زخمیوں میں سجاد اشرف، ریاض، غلام شبیر، شوکت، عبدالرزاق سمیت دیگر افراد شامل ہیں۔ افسوس ناک حادثے میں جاں بحق افراد کا تعلق کے پی کے اور بلوچستان سے ہے۔ دریں اثناءشاہ کوٹ جڑانوالہ روڈ چک نمبر 14کے قریب سکول جاتے ہوئے طلباءکی موٹرسائیکل شدید دھند کے باعث ٹریکٹر ٹرالی سے ٹکرا گئی جس کے نتیجہ میں موٹر سائیکل سوار 17سالہ فرحان، 13سالہ سمیع اللہ اور 12سالہ اسامہ شدید زخمی ہو گئے۔ تینوں سگے بھائی ہیں۔ ابتدائی طبی امداد فراہم کرنے کے بعد تحصیل ہیڈ کوارٹرز ہسپتال شاہ کوٹ منتقل کر دیا گیا۔ وزیراعلیٰ پنجاب چودھری پرویز الٰہی نے راجن پور کے قریب ٹریفک حادثے میں قیمتی انسانی جانوں کے ضیاع پر دکھ اور افسوس کا اظہار کیا ہے۔ وزیراعلیٰ نے جاں بحق افراد کے لواحقین سے دلی ہمدردی اور تعزیت کا اظہار کیا ہے۔ افسوسناک واقعہ کے بارے میں رپورٹ طلب کر لی ہے اور ہدایت کی کہ حادثے کے ذمہ دار ڈرائیور کے خلاف قانون کے مطابق کارروائی کی اور زخمیوں کو علاج معالجے کی بہترین سہولتیں فراہم کی جائیں۔ کہا کہ جاں بحق ہونے والے افراد کے لواحقین کے غم میں برابر کے شریک ہیں۔ فیروز وٹواں کے قریب مکی روڈ پر دھند کے باعث دو موٹر سائیکلیں آپس میں ٹکرا گئیں جس کے نتیجہ میں ایک کمسن بچی جاں بحق جبکہ ایک شخص شدید زخمی ہوگیا جسے ریسکیو ٹیموں نے فوری طور پر ڈی ایچ کیو ہسپتال منتقل کردیا۔ بتایا گیا ہے کہ دوست محمد وغیرہ موٹر سائیکل پر سوار ہوکر فیروز وٹواں آرہے تھے کہ دھند کے باعث مخالف سمت سے آنے والی موٹرسائیکل سے ٹکرہوگئی جس کے نتیجہ میں چار سالہ ماہم موقع پر جاں بحق جبکہ دوست محمد شدید زخمی ہوگیا۔ پولیس نے ضروری کارروائی کے بعد نعش ورثاءکے حوالے کر دی۔
ٹریفک حادثات