پاکستان سپر لیگ(پی ایس ایل)تھری کی ٹرافی کی رونمائی دبئی میں کر دی گئی۔پی ایس ایل تھری ٹرافی کی تقریب رونمائی دبئی کرکٹ سٹیڈیم میں ہوئی۔ ایونٹ میں شریک 6 ٹیموں کے مالکان، کپتانوں، چیئرمین پی سی بی اور دیگر آفیشلز نے شرکت کی۔دفاعی چیمپئن پشاور زلمی کے کپتان ڈیرن سیمی خصوصی باکس میں بند ٹرافی کو ہیلی کاپٹر سے اٹھا کر تقریب میں لائے اور اسٹیج پر رکھا، ان کے ساتھ دیگر ٹیموں کے کپتان بھی موجود تھے۔ تقریب رونمائی سے قبل پریس کانفرنس ہوئی۔تقریب سے خطاب کرتے ہوئے  پی سی بی کے چیئرمین نجم سیٹھی کا کہنا تھا کہ پی ایس ایل ٹرافی کی تقریبِ رونمائی میں تمام ٹیموں کے کپتان موجود ہیں۔ سرفراز احمد پاکستانی ٹیم کے تینوں فارمیٹس کے کپتان ہیں۔ انہوں نے پاکستان کے لیے چیمپینز ٹرافی جیت کر تاریخ بنائی۔ سینئر کھلاڑی مصباح جینٹل مین اور بہترین کپتان ہیں، عماد وسیم ایک ابھرتا ہوا کھلاڑی ہے، شعیب ملک ملتان سلطانز کے کپتان ہیں جبکہ ڈیرن سیمی پاکستان میں سپر سٹار ہیں۔نجم سیٹھی نے کہا کہ فرنچائز کے بغیر پی ایس ایل نہیں ہو سکتا، تمام فرنچائز مالکان کے تعاون پر شکریہ ادا کرتے ہیں۔ انہوں نے اعلان کیا کہ بہترین بولر، بلے باز اور فیلڈر کو بھی ٹرافی دی جائے گی۔ ان کا کہنا تھا کہ نیوزی لینڈ کو پاکستان میں کھیلنے کی دعوت دیتے ہیں۔ امید ہے ایک دن نیوزی لینڈ کی ٹیم بھی پاکستان میں کھیلنے ضرور آئے گی۔اس موقع پر گفتگو کرتے ہوئے سابق کپتان شاہد خان آفریدی کا کہنا تھا کہ پی ایس ایل کا انعقاد نجم سیٹھی کے لیے ایک چیلنج تھا، پی ایس ایل کو کامیاب بنانے میں ان کا اہم کردار ہے۔ ان کا کہنا تھا کہ کرکٹ کو فروغ دینے پر فرنچائز مالکان کا شکریہ ادا کرتا ہوں، بہترین بیٹسمین، بولر، فیلڈر اور وکٹ کیپر کو بھی ٹرافیز دی جائیں گی جنہیں پاکستان کے لیجنڈری پلیئرز کے نام سے منسوب کیا گیا ہے۔اس موقع پر مصباح الحق نے کہاکہ پی ایس ایل میں پہلے  سے زیادہ دلچسپ مقابلے ہوں گے۔ لاہور قلندرزکے کپتان مک کولم کاکہناتھاکہ اس ایونٹ  سے نوجوان کھلاڑی ابھرکے سامنے آئیں گے۔ انھوں نے امیدظاہر کی کہ ایونٹ میں اچھے مقابلے ہوں گے۔کوئٹہ گلیڈیٹرزکیکپتان سرفرازاحمد کاکہناتھاکہ اس بارٹرافی جیتنے کی بھرپورکوشش کریں گے۔ کراچی کنگز کے کپتان نے کہاکہ ٹیم کی قیادت پر فخر ہے۔ پی ایس ایل کی نئی ٹیم ملتان سلطان کے کپتان شعیب ملک کا کہناتھاکہ پی ایس ایل سے نئے کھلاڑی سامنے آرہے ہیں،پاکستان سپر لیگ میں پہلی بار 6 ٹیمیں شرکت کر رہی ہیں، دفاعی چیمپئن پشاور زلمی کے کپتان ڈیرن سیمی، اسلام آباد یونائیٹد کے کپتان مصباح الحق، کوئٹہ گلیڈی ایٹرز کے کپتان سرفراز احمد، کراچی کنگز کے کپتان عماد وسیم، لاہور قلندرز کے کپتان برینڈن میک کولم اور نئی ٹیم ملتان سلطانز کی قیادت شعیب ملک کر رہے ہیں۔واضح رہے کہ پی ایس ایل تھری کا میلہ 22 فروری سے سجے گا، ابتدائی میچز دبئی اور شارجہ میں کھیلے جائیں گے، دو پلے آف لاہور جبکہ فیصلہ کن معرکہ نیشنل کرکٹ اسٹیڈیم کراچی میں شیڈول کیا گیا ہے۔گزشتہ ایڈیشن کا فائنل جیتنے والی پشاور زلمی ٹیم کو اپنی مہم کا آغاز افتتاحی روز ملتان سلطانز کیخلاف میچ سے کرنا ہے۔