سینئر صحافی اطہر احمدمتین آہوں اور سسکیوں کے ساتھ سپردخاک 

کراچی (نیوز رپورٹر) کراچی میں گزشتہ روز ڈاکوئوں کی فائرنگ سے جاں بحق ہونے والے کراچی پریس کلب کے ممبراورسماٹی وی کے سینئرپروڈیوسراطہراحمد متین کو ہفتہ کی سہہ پرآہوں اور سسکیوں کے ساتھ یاسین آباد قبرستان میں سپردخاک کردیاگیا۔کراچی پریس کلب کے ممبراطہراحمد متین جمعہ کی صبح ڈاکوئوں کی فائرنگ سے شہید ہوگئے تھے۔ان کی نمازِ جنازہ ہفتہ کوبعد نمازظہر مسجد صدیق اکبر کلفٹن بلاک 5 میں ادا کی گئی۔نمازِ جنازہ میں صدر مملکت ڈاکٹر عارف علوی، گورنرسندھ عمران اسماعیل،وزیراطلاعات سندھ سعیدغنی،پاکستان تحریک انصاف کے رہنما عبدالعلیم خان،ایم کیوایم پاکستان بحالی کمیٹی کے سربراہ ڈاکٹر فاروق ستار،جماعت اسلامی کراچی کے امیر حافظ نعیم الرحمن،پاک سرزمین پارٹی کے رہنما ارشد وہرا ،ایم کیوایم پاکستان کے رہنما عامرخان،وسیم اختر،کراچی پریس کلب کے سیکرٹری محمدرضوان بھٹی،جوائنٹ سیکرٹری اسلم خان، گورننگ باڈی کے ممبراطہرحسین،کے یوجے کے جنرل سیکرٹری فہیم صدیقی، حسن عباس،سید راشدعزیز،موسی کلیم ،آباد کے چیئرمین محسن شیخانی سمیت مرحوم کے اہلِ خانہ، دوست، احباب، عزیز و اقارب صحافی برادری سمیت شہریوں کی ایک بڑی تعدادنے شرکت کی ۔
سینئر صحافی اطہر احمدمتین