کراچی میں فائرنگ، دستی بم حملہ، پیش امام سمیت 4 افراد جاں بحق ``

کراچی (نوائے وقت رپورٹ) کراچی میں گذشتہ روز ٹارگٹ کلنگ میں4 افراد جاں بحق ہو گئے۔ فائرنگ کے واقعات کورنگی، کھارادر، پرانی سبزی منڈی کے قریب پیش آئے۔ کھارادر کے قریب نامعلوم افراد کی فائرنگ سے ایک شخص جاں بحق ہو گیا۔ پرانی سبزی منڈی کے قریب نشتر بستی میں نامعلوم افراد نے فائرنگ کر کے ایک شخص کو ہلاک کر دیا۔ فائرنگ کا تیسرا واقعہ کالا پل کے قریب پیش آیا۔ ادھر کورنگی میں موٹر سائیکل سوار تبلیغی جماعت سے تعلق رکھنے والے شخص کو قتل کر کے فرار ہو گئے۔ 24 گھنٹوں میں تبلیغی جماعت کے 5 افراد نشانہ بن چکے ہیں۔ عثمان غنی مسجد سے نماز فجر پڑھ کر نکلنے والے غلام حسین پیش امام کو گولی مار کر قتل کیا گیا۔ علاوہ ازیں بلدیہ ٹاﺅن میں نامعلوم افراد کپڑا بنانے والی فیکٹری کے گیٹ پر دستی بم پھینک کر فرار ہو گئے تاہم کوئی جانی نقصان نہیں ہوا ہے۔ ادھر نارتھ ناظم آباد سے 5 افراد کے قتل میں ملوث ٹارگٹ کلر کو گرفتار کر لیا گیا۔