اسلام آباد (خبر نگار) چیئرمین سینٹ محمد صادق سنجرانی نے شمالی وزیرستان میں سکیورٹی فورسز کی چیک پوسٹ پر حملے کے نتیجے میں دو اہلکاروں کی قیمتی جانوں کے ضیاع پر افسوس کا اظہارکیا ہے۔ چیئرمین سینٹ نے کہا کہ ملک دشمن عناصر اپنے مذموم مقاصد میں کامیاب نہیں ہو سکتے۔ ڈپٹی چیئرمین سینٹ سینیٹر مرزا محمد آفریدی، سینٹ میں قائد ایوان سینیٹر ڈاکٹر شہزاد وسیم اور قائد حزب اختلاف سینٹ سینیٹر سید یوسف رضا گیلانی نے بھی سکیورٹی فورسز کے اہلکاروں کی قیمتی جانوں کے ضیاع اور جعفر ایکسپریس کے حادثے پر افسوس کا اظہار کیا ہے۔ علاوہ ازیں چیئرمین سینٹ محمد صادق سنجرانی کے بھائی مرحوم سالار خان سنجرانی کے انتقال پر اظہار تعزیت کیلئے قطر کے سفیر شیخ سعود بن عبدالرحمان الثانی اسلام آباد میں واقع چیئرمین سینٹ کی رہائش گاہ پہنچ گئے۔ شیخ سعود بن عبدالرحمان الثانی نے چیئرمین سینٹ سے تعزیت کا اظہار کیا۔