فیروز والہ( نامہ نگار) لاہور کا نوجوان طالب علم تھانہ فیروزوالہ میں قتل جبکہ کرکٹ کے تنازعہ پر محنت کش ہلاک ہو گیا ۔ داروغے والا لاہور کا رہائشی نوجوان گریجوایٹ حمزہ گھر سے باہر آیا تو نامعلوم افراد نے اسے اغوا کرلیا‘ کالا شاہ کاکو کے قریب چک نمبر42  میں لا کر گولیاں مار کر قتل کرکے نعش کھیت میں پھینک دی اورفرار ہو گئے۔ فیروزوالا پولیس نے نامعلوم افراد کے خلاف قتل کے الزام میں مقدمہ درج کرکے نعش قبضے میں لے کر ہسپتال بھجوا دی ۔سرحدی گاؤں دھوپ سڑی میں کرکٹ کھیلنے کے جھگڑے پر محبوب نے اپنے ساتھیوں کی مدد سے مسلح ہو کر اپنے مخالف کھلاڑی جمشید پر فائرنگ کی جس کی زد میں آ کر اس کا باپ ذوالفقارعلی ہلاک ہو گیا جبکہ مقتول کا بیٹا جمشید محفوظ رہا ۔ملزم کی گولی لگنے سے اس کا ساتھی وفاعرف گوگا زخمی ہوگیا جسے ہسپتال میں داخل کرا دیا گیا۔ نارنگ پولیس نے مقتول کی بیوی کی رپورٹ پر ملزموں کے خلاف قتل کے الزام میں مقدمہ درج کر لیا ۔جی ٹی روڈ کی آبادی کالا شاہ کاکو قریب نامعلوم نوجوان کی تشدد زدہ نعش ملی ۔پولیس نے نعش کو  قبضہ میں لے کر ضروری کاروائی کیلئے ہسپتال بھجوا دی تاہم متوفی کی شناخت نہ ہو سکی۔ لاہور روڈ کی آبادی بتی چوک کے قریب نوجوان کاشف نے دیگر ساتھیوں کی مدد سے مسلح ہو کر فائرنگ کر کے نوجوان کاظم کو ہلاک کردیا۔ چند روز قبل دونوں فریقین میں جھگڑا ہوا تھا جس کا بدلہ لینے کی خاطر کاشف نے اپنے ساتھیوں وقار،مزمل اورسفیان وغیرہ نے چیچوں کی ملیاں کی طرف جانے والے 21سالہ کاظم شاہ اوروالدہ عطیہ بی بی کی موٹرسائیکل روک کر فائرنگ کرکے کاظم شاہ کو قتل کردیا اورفرار ہوگئے ۔صدر پولیس نے والد کی مدعیت میں چارنامز د ملزمان کے خلاف قتل کا مقدمہ درج کرلیا۔