لاہور(سپورٹس رپورٹر)سابق کپتان قومی کرکٹ ٹیم انضمام الحق نے کہاہے کہ پاکستان ٹیم کے چیف سلیکٹر کیلئے مجھ سے رابطہ نہیں کیا گیا۔ اگر کوچ یا چیف سلیکٹر کی آفر ہوگی تو دیکھوں گا۔ کسی بھی کھلاڑی پر پریشر ہو تو اس کی پرفارمنس متاثر ہوتی ہے، بابرکی تین فارمیٹ میں پرفارمنس بہترین ہے، اس پر پریشر نہیں ہے لیکن کپتانی وقت کے ساتھ ہی آتی ہے، بابرکو مزید کپتانی کا موقع ملنا چاہیے۔ کھیلوں سے متعلق پاکستان کا مؤقف ہمیشہ مثبت رہا ہے ،افغانستان ہو یا بھارت کرکٹ کھیلنی چاہیے۔ غیر ملکی کوچ ہی پاکستانی ٹیم کا حل نہیں، پاکستانی کوچز بھی اچھے ہیں، میرے دور میں مکی آرتھر نے بہت اچھا کام کیا تھا اور اب ہمارے کوچز ثقلین مشتاق اور محمد یوسف بھی اچھا کام کر رہے ہیں۔ غیرملکی اور لوکل کی بات نہیں جو بھی کرکٹ کھیلا ہوا ہے وہ کوچنگ کر سکتا ہے۔پشاور سمیت پورے پاکستان میں پی ایس ایل کے میچز کا انعقاد ہونا چاہیے،پی ایس ایل کے میچز پورے پاکستان میں ہوں گے تو انٹرنیشنل ٹیمیں مختلف وینیوز پر کھیلنے کیلئے رضا مند ہوں گی۔