شیخوپورہ؍ ٹوبہ ٹیک سنگھ (نمائندہ خصوصی+ نمائندہ نوائے وقت+ نامہ نگار) پاکستان تحریک انصاف کے سینئر رہنما چوہدری محمد سعید ورک، چوہدری محمد اویس عمر ورک کی قیادت میں مہنگائی کے خلاف ریلی نکالی گئی، جس میں چوہدری محمد عثمان ورک، چوہدری غلام نبی ورک، بلال اعجاز چنبل، امان اللہ سوہل کے علاوہ کارکنوں کی بڑی تعداد نے شرکت کی۔ ریلی چوک جناح پارک میں جلسہ کی شکل اختیار کر گئی۔ اس موقع پر گفتگو کرتے ہوئے چوہدری محمد سعید ورک نے کہا کہ آئندہ 90دنوں میں پنجاب اور خیبر پختونخواہ سمیت ملک بھر میں عام انتخابات ہونے جا رہے ہیں۔ کوئی روک نہیں سکتا چوہدری محمد اویس عمر ورک نے کہا  امپورٹڈ حکمران عوام پر مہنگائی کا بوجھ روز بروز بڑھا رہے ہیں جس پر پی ٹی آئی خاموش نہیں بیٹھے گی۔ عوام کی منتخب قیادت ہی حقیقی معنوں میں ملکی نظام چلاسکتی ہے۔ ٹوبہ ٹیک سنگھ سے نامہ نگار کے مطابق چیئرمین پاکستان تحریک انصاف عمران خان کی کال پر پی ٹی آئی رہنما بریگیڈئیر (ر) جاوید اکرم کی قیادت میں الیکشن کراؤ ملک بچاؤ ‘‘اور روز بروز بڑھتی ہوئی مہنگائی کے خلاف احتجاجی ریلی نکالی گئی۔ رانا غلام سرور بابر نے رجانہ چوک میں استقبال کیا۔ احتجاجی ریلی کے شرکاء سے خطاب کرتے ہوئے بریگیڈئیر (ر) جاوید اکرم نے کہا کہ موجودہ حالات میں ہم سیاست نہیں بلکہ جہاد کر رہے ہیں، ہر پاکستانی کو چاہیے کہ وہ اپنے حقوق کیلئے باہر نکلے۔