ماموں کانجن (نامہ نگار) فیصل آباد کے حلقہ این اے 97تاندلیانوالا/ ماموں کانجن میں مسلم لیگ ن کو بڑا سیاسی جھٹکا لگ گیا۔ سابق لیگی ایم این اے عائشہ رجب بلوچ پی ٹی آئی کے نامزد امیدوار سعداللہ بلوچ کے حق میں الیکشن سے دستبردارہوگئیں۔ واضح رہے کہ سابق لیگی وفاقی پارلیمانی سیکرٹری خوراک و زراعت میں رجب علی خاں مرحوم کی اہلیہ عائشہ رجب بلوچ نے لیگی قیادت سے وعدہ کے باوجود ٹکٹ نہ ملنے پر اس حلقہ سے اپنے دیور لیگی امیدوار علی گوہر بلوچ کے مقابلہ میں آزاد حیثیت میں الیکشن لڑنے کا اعلان کر کے اپنی کمپین شروع کردی تھی۔ اسی دوران پی ٹی آئی کے صوبائی سیکرٹری جنرل یاسر خاں بلوچ نے عائشہ رجب بلوچ کو پی ٹی آئی میں شمولیت کے لئے آمادہ کیا جنہوں نے پی ٹی آئی کے نامزد امیدوار سعداللہ خاں بلوچ جو کہ سابق وفاقی وزیر مملکت میاں ناصر خاں بلوچ کے صاحبزادے ہیں کی حمایت کا اعلان کردیا۔ ان کے بیٹے  روشان رجب بلوچ نے  سعداللہ بلوچ کی حمایت کا ویڈیو بیان جاری کرکے اپنے گروپوں کو آگاہ کردیا۔