چھبیس جون کو آزاد کشمیر میں عام انتخابات کے دوران حلقہ ایل اے سولہ باغ چارحویلی میں آٹھ پولنگ سٹیشنز پر ووٹوں سے بھرے ہوئے تھیلے جلائے جانے کے بعد الیکشن کمیشن آزاد کشمیر نے بیس جولائی کو دوبارہ پولنگ کرانے کا اعلان کیا تھا۔ حلقے میں ان ہی آٹھ پولنگ سٹیشنز پر دوبارہ ووٹنگ جاری ہے۔ ایل اے سولہ کی نشست پرپیپلزپارٹی کے فیصل ممتاز راٹھور اور مسلم کانفرنس کے امیدوارچوہدری محمد عزیزمد مقابل ہیں۔ ایل اے سولہ باغ چارحویلی میں قائم پولنگ سٹیشن کے باہر دوسیاسی جماعتوں کے کارکنوں کے درمیان فائرنگ کے نتیجے میں ایک شخص جاں بحق ہوگیا جبکہ ایل اے تیس اورچھتیس میں انتخابات کے لیے پُرامن طریقے سے پولنگ جاری ہے۔ تینوں حلقوں میں پولنگ صبح آٹھ بجے شروع ہوئی جو بلا تعطل شام پانچ بجے تک جاری رہے گی۔ انتخابات کے موقع پرسکیورٹی کے سخت انتظامات کئے گئے ہیں۔ حلقہ ایل اے تیس سے ایم کیوایم کےسلیم بٹ اورایل اے چھتیس سے طاہرکھوکھر امیدوار ہیں جبکہ پیپلزپارٹی اور مسلم کانفرنس کے امیدوار ایم کیوایم کے حق میں دستبردار ہوچکے ہیں۔