ہاشو فاؤنڈیشن کی جانب سے قومی کرکٹرز کیلئے کیش ایوارڈز

اسلام آباد (سپورٹس رپورٹر) آئی سی آئی چیمپئنز ٹرافی کی فاتح قومی کرکٹ ٹیم کے اعزاز میں ہاشو فاؤنڈیشن کے چیئرمین صدر الدین ہاشوانی نے بدھ کی شب اسلام آباد میریٹ میں عشائیہ دیا جس میں پی ایس ایل کے سربراہ نجم سیٹھی ‘ پی سی بی گورنننگ بورڈ کے ارکان شکیل شیخ‘ میجر (ر) نعیم گیلانی سمیت راولپنڈی اسلام آباد کی مقتدر شخصیات نے شرکت کی۔ عشائیہ میں ٹیم کپتان سرفراز احمد‘ احمد شہزاد‘ اظہر علی‘ شاداب خان‘ رومان رئیس‘ فہیم اشرف‘ عماد وسیم اور وہاب ریاض نے شرکت کی۔ دیگر کھلاڑی مصروفیات کے باعث نہیں آ سکے۔ ہاشو فاؤنڈیشن کی جانب سے صدر الدین ہاشوانی نے قومی ٹیم کے کپتان سرفراز احمد کو پانچ لاکھ جبکہ ٹیم کے تمام کھلاڑیوں کو تین تین لاکھ روپے کیش ایوارڈ دیا۔ صدر الدین ہاشوانی نے اس موقع پر خطاب کرتے ہوئے کہا کہ قومی ٹیم نے فائنل میں بھارت کو کلین سویپ کر کے جسطرح چیمپئنز ٹرافی جیتی اس سے پوری قوم کا سر فخر سے بلند کر دیا۔ ان کی شاندار پرفارمنس برسوں یاد رہے گی۔ پی ایس ایل کے سربراہ نجم سیٹھی اور ٹیم کپتان سرفراز احمد نے کہا کہ جس طرح پورے ملک میں قومی ٹیم کی پذیرائی ہو رہی ہے ماضی میں اس کی کوئی مثال نہیں۔ ایسی تقاریب کھلاڑیوں کے سر فخر سے بلند کر دیتی ہیں۔