لاہور (خصوصی نامہ نگار) بادشاہی مسجد لاہور میں جمعۃ المبارک کے  اجتماع سے سفیر امن مولانا سید محمد عبدالخبیر آزاد نے خطاب کرتے ہوئے کہا کہ حضرت سیدنا امام حسینؓ کی شہادت سے جو سبق ہمیں ملتا ہے وہ ہمارے لیے مشعل راہ ہے، حضرت سیدنا امام حسینؓ اور ان کے خاندان کے 72لوگوں کی شہادت اسلام کی بقاء اور عزت کیلئے تھی۔ محرم الحرام میں امن کے قیام کیلئے علماء کرام، انتظامیہ، سکیورٹی اداروں، پولیس کا کردار قابل تحسین ہے۔ اس موقع پر وزیر اعلیٰ پنجاب مریم نواز شریف نے عاشور ہ محرم الحرام میں اپنی ٹیم کے ساتھ ملکر سکیورٹی انتظامات کو مضبوط بنانے میں عظیم کردار ادا کیا ہے جو کہ لائق تحسین ہے۔ حکومت پاکستان، افواج پاکستان، رینجر، پولیس اور دیگر اداروں کی خدمات بھی قابل تعریف ہیں۔ اسرائیلی دہشت گردی نامنظور ہے، عالمی سطح پر او آئی سی اور یو این او اس کا بھر پور نوٹس لیں۔ بعدا ز نماز جمعہ ملکی سلامتی، ترقی و خوشحالی، استحکام پاکستان، عالم اسلام کے اتحاد،حرمین شریفین کے تحفظ،مقبوضہ کشمیر اور غزہ و فلسطین کی آزادی کیلئے خصوصی دعا کی گئی۔