کراچی(نوائے وقت نیوز) کراچی میں مختلف علاقوں میں فائرنگ اوراندھی گولی لگنے سے ایک شخص جاں بحق جبکہ دوبچے زخمی ہوگئے ہیں، پہلا واقعہ لانڈھی کے علاقے89 کے قریب پیش آیا جہاں نامعلوم سمت سے آنے والی گولی لگنے سے کوئٹہ درویش ہوٹل پر موجود 14سالہ بچہ زخمی ہو گیا۔بچے کی شناخت فہد ولد محمدسعیدکے نام سے ہوئی۔ زخمی فہدکوطبی امداد کے لیے جناح ہسپتال منتقل کر لیا گیا۔ادھر نیو کراچی کے قریب خمیسو گوٹھ سیکٹر فائیو اے میں نامعلوم سمت سے آنے والی گولی لگنے سے ایک بچہ زخمی ہو گیا۔زخمی بچے کی شناخت 7 سالہ احمد رایاولدفاروق کے نام سے ہوئی جسے طبی امداد کے لئے سول ہسپتال منتقل کر دیا گیا۔نیوکراچی کے علاقے ایوب گوٹھ میں نامعلوم مسلح افراد کی فائرنگ سے 35سالہ محمدشفیق جاں بحق ہوگیا۔پولیس کے مطابق واقعہ ڈکیتی مزاحمت پر پیش آیا،پولیس نے تحقیقات کا آغاز کردیاہے۔