کوپا امریکہ فٹ بال کپ : ارجنٹائن نے یورو گوئے کو شکست دیدی 

لاہور (سپورٹس ڈیسک ) ارجنٹائن نے کوپا امریکہ فٹ بال کپ میں یورو گوئے کو صفر کے مقابلے میں ایک گول سے شکست دیدی ۔ کھیل کے دسویںمنٹ میں لیونل میسی کے پاس پر گوئیڈو روڈری گوئز نے گیند کو جال میں پھینک کر ارجنٹائن کو برتری دلائی جو میچ کے آخرتک برقرار رہی ۔ فاتح ٹیم کو جیت پر تین پوائنٹس مل گئے ۔ یورو گوئے پول میں کسی پوائنٹ کے بغیر آخری پوزیشن پر ہے ۔ بولویا نے بھی دو میچ کھیل کر شکست کھائی ہے ۔ ارجنٹائن کے مڈ فیلڈر روڈری گوئز نے کہا کہ ہم فتح کے مستحق تھے ‘ہم نے اچھا مقابلہ کیا ‘گول کرنا بہت مشکل تھا ۔ہمارے پاس ایسے بہترین کھلاڑی ہیں جو میچ میں کسی بھی وقت گول کرنے کی صلاحیت رکھتے ہیں ۔ ہمارے لئے آج جیتنا بہت اہم تھا ۔ تمام کھلاڑی ذہنی طور پر مطمئن ہیں ۔ جیت کے تسلسل کو برقرار رکھنے کی کوشش کرینگے ۔