لورالائی(نامہ نگار ) ضلع لورالائی میں کورونا ویکسینیشن مہم جاری ہے اور تمام یونین کونسل میںمنتخب کرد ہ ٹیمیں مہم کو کامیاب بنانے کے لئے بھر پور کوششیں جاری رکھے ہوئے ہیں اس سلسلے میںڈپٹی کمشنر لورالائی ڈاکٹر عتیق الرحمن کی صدارت میں اجلاس ہوا ۔اجلاس میں ڈپٹی ڈی ایچ اوڈاکٹر عبدالحلیم ،ایم ای آفیسر میرزادہ کاکڑ،ڈی ایس وی عبدالجبار اور دیگر نے شرکت کی۔ ڈاکٹر عبدالحلیم نے اجلاس میں بتایا کہ محکمہ صحت کی جانب سے بنائی گئی ٹیمیں تمام یونین کونسل میں لوگوں کو کورونا کی بوسٹر ڈوز لگانے میں مصروف عمل ہیں اور پانچ دنوں میںٹیموں نے اچھی کارکردگی کا مظاہرہ کرتے ہوئے دس ہزار افراد کو بوسٹر ڈوز لگائے اور ان شاء اللہ ٹیمیں اپنا ہدف پوراکریں گی۔ اس مہم میں تمام گورنمنٹ ،پرائیویٹ سکول، کالج،مدرسوں میں بھی بوسٹر ڈوز کی ویکسینیشن کی جائے گی۔ انہوں نے کہا کہ بوسٹر ڈوز لگانا لازمی ہے زندگیوں کو محفوظ بنانے کے لئے بوسٹر ڈوز ضرور لگائیں انہوں نے پولیس اور ضلعی انتظامیہ کی جانب سے مکمل تعاون پر انکا شکریہ ادا کرتے ہوئے امید ظاہر کی کہ انکا تعاون جاری رہیگا۔