عید جوش و جذبے سے منائی  گئی، 5لاکھ جانور کم قربان

لاہور؍ اسلام آباد (کامرس رپورٹر+ آئی این پی)ملک بھر میں عیدالاضحی مذہبی جوش و جذبے سے منائی گئی اور نماز عید کی ادائیگی کے بعد سنت ابراہیمی کی پیروی میں جانور قربان کیے گئے۔ ملک کے چھوٹے بڑے شہروں میں نماز عید کے اجتماعات کا انعقاد ہوا۔ بادشاہی مسجد لاہور میں نماز عید الاضحی کا بڑا اجتماع ہوا جہاں چیئرمین رویت ہلال کمیٹی مولانا عبدالخبیر آزاد نے نماز عید کی امامت کی۔ گورنر پنجاب سردار سلیم حیدر اور دیگر اہم شخصیات نے یہاں نماز ادا کی۔ رواں سال عیدالاضحی کے موقع پر ملک میں گزشتہ برس کی نسبت تقریباً 5 لاکھ کم جانوروں کی قربانی کی گئی۔ ایک تجزیے کے مطابق شدید گرمی اور لوڈشیڈنگ کے نتیجے میں تقریباً 35 فیصد کھالیں خراب ہو گئی ہیں۔ پاکستان ٹینرز ایسوسی ایشن (پی ٹی اے) کے سابق چیئرمین آغا سیدالدین نے کہا کہ تقریباً 58لاکھ 60 ہزار جانوروں، جن میں 20 لاکھ گائے، 30 لاکھ  بکرے، 8لاکھ بھیڑیں اور 60 ہزار اونٹوں کو عیدالاضحی کے دوران قربان کیا گیا جبکہ گزشتہ سال 63لاکھ 60 ہزار جانوروں کی قربانی کی گئی تھی۔ آغا سیدین نے کہا کہ پچھلے سال کے مقابلے میں اس سال تقریباً 5 لاکھ بکروں کی کمی کا اندازہ لگایا گیا ہے اس مرتبہ قربانی کے جانوروں کی قیمتوں میں اضافہ دیکھا گیا۔ نتیجتاً، قربانی کے جانوروں کی کل مالیت بڑھ کر 494 ارب روپے ہو گئی، گزشتہ سال کی قربانی کے جانوروں کی مجموعی مالیت  421 ارب روپے تھی۔ عیدالاضحیٰ 2024 کے موقع پر گائے کی اوسط قیمت 25,000 روپے اضافے سے 150,000 روپے تک بڑھ گئی، بکرے کی اوسط قیمت 5000 روپے اضافے سے 50,000 روپے  رہی، بھیڑ کی اوسط قیمت 10,000 روپے اضافے سے 40,000 روپے تک پہنچ گئی۔ جبکہ اونٹ کی اوسط قیمت 200,000 روپے رہی، انہوں نے مزید کہا کہ کھالوں اور کھالوں کی بین الاقوامی مارکیٹ میں کمی کے رجحان سمیت متعدد عوامل کی وجہ سے اس سال کھالوں اور کھالوں کی مجموعی قیمت کا تخمینہ گزشتہ سال کے 4.6 ارب روپے کے مقابلے میں 5.06 ارب روپے لگایا گیا ہے۔