وزیراعظم ن لیگ کے منصوبوں پر تختیاں لگارہے ہیں:پرویزملک‘ عمران نذیر

لاہور(نیوزرپورٹر) مسلم لیگ ن لاہور کے صدر و رکن قومی اسمبلی محمد پرویز ملک، و جنرل سیکرٹری و رکن پنجاب اسمبلی خواجہ عمران نذیر اور ایڈیشنل سیکرٹری اطلاعات عامر خان نے کہا ہے کہ حکمرانوں کی کارکردگی زیرہے ‘ ن لیگ دور کے منصوبوں کا افتتاح کرکے اپنی تختیاں لگائی جا ری ہیں، اقتدار میں ایسے شخص کو بٹھا دیا گیا ہے جو جھوٹ بول کر نالائقی کو چھپانے کی کوشش کر رہا ہے۔مالاکنڈ یونیورسٹی کا آغاز مسلم لیگ ن نے 2015 میں کیا اور اس کا افتتاح آج عمران خان نے کیا ،عمران خان نے کہا کہ گذشتہ حکومت نے تعلیم کے لئے کچھ نہیں کیا حالانکہ اس منصوبے پر 2 تہائی کام ہمارے دور میں مکمل ہو چکا تھا ،عمران خان اس منصوبے کو بھی بروقت مکمل نہیں کر سکے جس کے پیسے ہم بجٹ میں ڈال کر گئے تھے ،کل آپ نے مزدوروں کے فلیٹس کے پرائے منصوبے کا افتتاح کر کے خود کو ورکرز کا مسیحا قرار دیا۔ ان خیالات کا اظہار انہوں نے گذشتہ روز پارٹی رہنماؤں اور کارکنوں سے گفتگو کرتے ہوئے کیا۔اس موقع پر سید توصیف شاہ، چوہدری شہباز ،غزالی سلیم بٹ چوہدری عبدالمجید چن نمبردار،اظہر فاروقی سمیت دیگر بھی موجود تھے۔انہوں نے کہا کہ مہنگائی اور حکومت کے خلاف نکلنے کے لئے پارٹی قائد میاں نواز شریف کے اشارے کے انتظارمیں ہیں ۔