اسلام آباد (نمائندہ خصوصی) بلاول ہاؤس سے جاری پریس ریلیز کے مطابق چیئرمین پیپلز پارٹی نے اپنے پیغام میں کہا کہ نوروز تجدید، امید اور اتحاد کی علامت ہے۔ انہوں نے کہا کہ اس پرمسرت دن پر میں پارسی برادری سمیت ان تمام پاکستانیوں کو دلی مبارکباد پیش کرتا ہوں جو نوروز جوش و خروش کے ساتھ مناتے ہیں۔ انہوں نے پاکستان کے متنوع ثقافتی منظرنامے میں پارسی برادری کے اہم کردار اور خدمات کو سراہا۔ بلاول بھٹو زرداری نے زور دیتے کہا کہ آئیے ہم نوروز کے جذبے کو بروئے کار لاتے ہوئے امن، اتحاد اور تعاون کو فروغ دیں، سرحدوں کو پار کریں اور تقسیم کا خاتمہ کریں۔ واضح رہے کہ نوروز فارسی کیلنڈر کا پہلا دن ہے، جس دنیا بھر میں مختلف ممالک اور برادریوں کی جانب سے منایا جاتا ہے۔