سیالکوٹ: بیوی نے دوسری شادی کے شبہ پر شوہر کو پٹرول چھڑک کر آگ لگا دی

سیالکوٹ (نوائے وقت رپورٹ) سیالکوٹ میں دوسری شادی کے شک پر بیوی نے اپنی تین بہنوں اور بہنوئی کے ساتھ مل کر اپنے شوہر کو پیٹرول چھڑ کر آگ لگا دی۔ پولیس کے مطابق واقعہ اگوکی کے محلہ رویل گڑھا میں پیش آیا۔ جھلسنے والے شخص شکیل کو ٹی ایچ کیو ہسپتال سمبڑیال منتقل کردیا گیا جہاں ڈاکٹرز کے مطابق متاثرہ شہری کے جسم کا 60 فیصد حصہ جل گیا۔ متاثرہ شخص کے مطابق اس کی بیوی اور اس کے درمیان چند روز سے نازاضی چل رہی تھی، گزشتہ روز وہ گھر پہنچا تو پھر جھگڑا شروع ہوگیا جس کے بعد گھر میں موجود بیوی نے اپنی تین بہنوں اور بہنوئی کے ساتھ مل کر اسے پٹرول چھڑک کر آگ لگادی۔ پولیس نے متاثرہ شخص شکیل کی مدعیت میں مقدمہ درج کر کے اس کی بیوی کی تین بہنوں اور بہنوئی کو گرفتار کر لیا جبکہ ملزمہ کی گرفتاری کے لیے چھاپے مارے جا رہے ہیں۔