سٹوڈیوز کی ویرانیاں دیکھ کر دل خون کے آنسو روتا ہے:شاہدہ منی

لاہور(این این آئی) اداکارہ شاہدہ منی نے کہا کہ سٹوڈیوز کی ویرانیاں دیکھ کر دل خون کے آنسو روتا ہے، فلم انڈسٹری کی فلاح و بہود کے لئے میری خدمات ہر وقت حاضر ہیں اور اس سے وابستہ تمام لوگوں سے التجا ہے کہ وہ ایک پلیٹ فارم پر اکٹھے ہوں۔شاہدہ منی کا کہنا تھاکہ ایک وقت وہ بھی تھا جب ہمارے سٹوڈیوز میں بیک وقت چار چار فلموں کی شوٹنگ ہوتی تھی لیکن آج یہ عالم ہے کہ وہاں ویرانیوں نے ڈیرے ڈال رکھے ہیں۔ انہوں نے کہا کہ اگر فلم انڈسٹری سے وابستہ لوگ اگر یہ عزم کر لیں کہ ہم نے انڈسٹری کو دوبارہ اپنے پائوں پر کھڑا کرنا ہے تو دنیا کی کوئی طاقت ان کی راہ میں حائل نہیں ہو سکتی۔ انہوں نے کہا کہ انڈسٹری کی بحالی دو ‘ تین فلموں کی نمائش سے ممکن نہیں اس کے لئے مسلسل کاوشیں کرنے کی ضرورت ہے اور اس کے لئے نئے سرمایہ کاروں کو آگے آنا ہوگا۔