کراچی (آئی این پی) پاک فضائیہ کے سربراہ ائر چیف مارشل سہیل امان نے پی اے ایف بیس مسرور کا دورہ کیا۔ان کی بیس آمد پر فضائیہ کے ایک چاق و چوبند دستے نے گارڈ آف آنر پیش کیا۔ دورے کا مقصدمختلف سکواڈرنز اور تنصیبات کی آپریشنل تیاریوں کا معائنہ تھا۔ پاک فضائیہ کے سر براہ ائر مینوں سے ملے اور ان کے دی گئی ذمہ داریوں کو بہ احسن طریقے سے انجام دینے کے جذبے کو سراہا۔ انہوں نے اس بات پر زور دیا کہ اس پیشہ وارانہ مہارت کے معیار کو برقرار رکھنے کیلئے مل جل کر اور مخلصانہ کوشش کرنی چاہیے تاکہ پاک فضائیہ کو بہترین جنگی حالت میں تیار رکھا جا سکے۔ ائر چیف نے اس بات پر زور دیا کہ ہمیں مادروطن کے دفاع کا مقدس فریضہ سرانجام دینے کے لیے ہرممکن کوشش کرنی چاہیے۔