خوفناک آتشزدگی سے 26 جھونپڑیاں خاکستر‘ جھگی نشینوں کا سایہ بھی چھن گیا

ملتان (کرائم رپورٹر) جھونپڑیوں میں خوفناک آتشزدگی سے 26 جھونپڑیاں جل کر راکھ ہو گئیں‘ جھگی نشین گھر سے بے گھر ہو گئے‘ تفصیل کے مطابق نیو لطیف آباد میں گزشتہ روز جھگی نشینوں کی جھونپڑیوں کو تندور سے آگ لگ گئی جو کہ وہاں پر موجود تمام جھونپڑیوں تک پھیل گئی۔ آتشزدگی کے دوران 26 جھونپڑیاں جل گئیں اور ان جھونپڑیوں میں موجود جھگی نشینوں کا لاکھوں روپے کا سامان بھی جل کر راکھ ہو گیا‘ اطلاع پر ریسکیو 1122 کی ٹیموں نے کارروائی کرتے ہوئے آگ پر قابو پا لیا تاہم اس وقت تک جھگی نشین جھونپڑیاں و سامان جل جانے سے اپنے گھروں سے بے گھر ہو چکے تھے۔ آتشزدگی کا واقعہ پیش آتے ہی علاقہ میں خوف و ہراس پھیل گیا خواتین و بچے مدد کے لئے پکارتے رہے۔ معلوم ہوا ہے کہ جل جانے والے سامان میں جہیز کا سامان بھی تھا۔