سیالکوٹ(نامہ نگار)مسلم لیگی ایم پی اے وضلعی نائب صدر مسلم لیگ (ن) خواتین ونگ سیالکوٹ شبینہ زکریا بٹ نے کہا ہے کہ شریف خاندان کا احتساب بدترین انتقام ہے (ن) لیگ کو الیکشن میں کامیابی سے کوئی طاقت نہیں روک سکتی میاںنواز شریف کیخلاف جاری پراپیگنڈہ سے ان کی مقبولیت میں ذرہ برابر بھی کمی نہیں آئی نواز شریف پر غداری کے الزامات لگانے والے اپنے گریبانوں میں جھانکیں ملکی ترقی وخوشحالی کا سفر 2013ء کے بعد نواز شریف کی قیادت میں شروع ہوا جس نے ملک میں امن وخوشحالی کے لیے ٹھو س اقدامات اٹھائے۔ لوڈشیڈنگ اور دہشتگردی سے نجات دلائی ،سی پیک گوادر پورٹ اوربجلی کے میگاپراجیکٹس اوردیگر ترقیاتی اہداف حاصل کیے ۔انہوںنے کہا عوام نواز شریف کے ساتھ کھڑی ہے لوٹے اورفصلی بٹیرے(ن)لیگ کو نقصان نہیں پہنچا سکتے مسلم لیگ (ن) ملک بھر سے کلین سویپ کرے گی اور مرکز سمیت چاروں صوبوں میں حکومت بنائے گی (ن) لیگ کے خلاف سازشیں کرنے والے چھپتے پھریں گے۔