ٹر یفک حادثات،دونوجوان ہلاک، پولیس اہلکار زخمی

لاہور (نامہ نگار)شہر میں ٹر یفک حادثات کے مختلف واقعات میںدونوجوان ہلاک جبکہ ایک پولیس اہلکار زخمی ہو گیا ہے ۔تفصیلات کے مطابق سندر کے علاقے میں تیز رفتار ٹرک بے قابو ہو کر موٹر سائیکل سے جا ٹکرایا۔ جس کے نتیجے میں موٹرسائیکل سوار 25 سالہ آصف ٹرک کے ٹائر تلے آکر موقع پرہی ہلاک ہو گیا جبکہ ٹرک ڈرائیور موقع سے فرار ہوگیا ہے ۔ اطلاع ملنے پر پولیس نے موقع پر پہنچ کرنعش قبضے میں لے کر پوسٹ مارٹم کے لئے مردہ خانے منتقل کر کے نامعلوم ڈرائیور کے خلاف مقدمہ درج کر لیا ہے ۔ سبزہ زار کے علاقے قاضی ٹائون کے قریب موٹرسائیکل تیز رفتاری کے باعث بے قابو ہوکر فٹ پاتھ سے ٹکرا گئی ۔ جس کے نتیجے میں موٹرسائیکل سوار22 سالہ مرتضی بٹ نیچے گرنے سے سر میں چوٹ لگنے کے باعث موقع پرہی دم توڑ گیا ہے۔ اطلاع ملنے پر پولیس نے موقع پر پہنچ کرنعش ضروری قانونی کارروائی کے بعد ورثا ء کے حوالے کر دی ہے۔ فیصل ٹائون کے علاقے مڑیاں سٹاپ پر پولیس نے ناکہ لگا رکھا تھا۔ جہاںایک کار بے قابو ہو کر ناکے پرکھڑے پولیس اہلکار سے جا ٹکرائی۔ جس کے نتیجے میں پولیس اہلکار زخمی ہو گیا۔ جسے طبی امداد کے لیے ہسپتال منتقل کر دیا گیا ہے جبکہ پولیس نے کار سوار کو گرفتار کر کے مقدمہ درج کر لیا ہے۔