فیصل آباد میں مسلم لیگ ن کے جلسہ عام سے خطاب کرتے ہوئے چوہدری نثار علی خان کا کہنا تھا کہ ملک بچانے کیلئےحکمرانوں کےعذاب سے نجات حاصل کرنا ہوگی، جس کے بعد غریبوں کے چولہے بھی جلیں گےاور لوگوں کو روزگابھی ملے گا۔ انہوں نے کہا کہ ن لیگ ایسی جماعت نہیں جو ہوا کے جھونکے سے آگے پیچھے ہوجائے اور حکمران تو سندھ کے عوام کا بھی سامنا نہیں کرسکتے، سیاسی طاقت اورجرات ہے تو زرداری صاحب عوام کے سامنے آئیں۔
جلسے سے خطاب کرتے ہوئے چوہدری نثار نے اپنی توپوں کا منہ عمران خان کی جانب بھی کیا۔ چوہدری نثارنے اثاثے ظاہر کرنے کے لیے عمران خان کو ایک ساتھ سپریم کورٹ ساتھ جانے کی دعوت دی اور الزام تراشی چھوڑ کرسپریم کورٹ کے خصوصی بنچ سے جانچ پڑتال کرانے کا مطالبہ کیا۔
قائد حزب اختلاف نے اپنے خطاب میں آئی ایس آئی کوبھی آڑے ہاتھوں لیا۔ انہوں نے کہا کہ پاک فوج سے کوئی جھگڑا نہیں، پاکستان کی افواج ملک کے ماتھے کا جھومر ہے۔ انہوں نے مزید کہا کہ آئی ایس آئی ایسا ادارہ ہونا چاہیے جس کے خوف سے دشمن پرلرزہ طاری ہوجائے ایسی آئی ایس آئی قبول ہے، سیاسی معاملات میں مداخلت اورلوٹے بنانے والی آئی ایس آئی کسی صورت قبول نہیں۔