کراچی (اسٹاف رپورٹر) پی آئی اے اسکائوٹس صوبائی ہیڈ کوارٹرز کے تحت ( اقبال ہمارا ) پر وقارتقریب منعقد ہوئی۔صوبائی سیکرٹری راشد امین ڈار نے صدارتی خطاب میں کہا ہے کہ علامہ اقبال نے اپنے فکر و فلسفہ اور فن شاعری سے پوری دنیا میں روشن خیالی اور عظمت انسان کے اعلیٰ تصورات قائم کئے اقبال کے افکار اور تعلیمات کو دنیا بھر میں سمجھا گیا اور اس پر عمل کیا جاتا ہے مگر ہمارے یہاں انہیں صحیح طور پر سمجھا نہیں گیا آج ہمیں اقبال کی تعلیمات کی پہلے سے زیادہ ضرورت ہے علامہ اقبال مصور پاکستان ہونے کے ساتھ مسلم اُمہ کے ترجمان بھی تھے‘ مفکر اسلام کے افکار نوجوانوں کیلئے مشعل راہ ہیں ہمیںاپنے ہیروز کو فراموش کرنے کی روایت ترک کرکے انہیںدلوں میں زندہ رکھنا چاہئے۔ صوبائی ترجمان سید محبوب قادری کے مطابق اختتامی تقریب میں نائب صوبائی سیکرٹری شمس خان و دیگر صوبائی و ضلعی عہدیداران غلام قادر‘ محمد عثمان‘ طارق انصاری‘ ڈسٹرکٹ کمشنر ز میڈم تصور عتیق‘ عبدالرئوف نے شرکت کی۔ میزبانی کے فرائض گرلز اسکائوٹس نے سر انجام دئیے۔ کمشنر گر لز میڈم تصور عتیق نے بھی خطاب کیا۔