بلائنڈ ٹی ٹونٹی ورلڈ کپ ‘افغانستان ٹیم پاکستان پہنچ گئی

لاہور(سپورٹس رپورٹر)افغانستان کی 18 رکنی بلائنڈ کرکٹ ٹیم چوتھے ٹی 20 بلائنڈ کرکٹ ورلڈ کپ میں شرکت کیلئے گزشتہ روزپاکستان پہنچ گئی۔ پاکستان بلائنڈ کرکٹ کونسل کے چیئرمین اور ورلڈ بلائنڈ کرکٹ لمیٹڈ کے صدر سیدسلطان شاہ نے کہا کہ افغانستان کی 18 رکنی ٹیم طورخم کے راستے پشاور پہنچ گئی جبکہ افغانستان کے دو کھلاڑیوں کو تاحال ویزے جاری نہیں کئے گئے،ویزے ملنے کے بعدوہ یہاں ٹیم کو جوائن کریں گے۔ ورلڈ کپ میں شرکت کیلئے جنوبی افریقہ کی ٹیم 20 نومبر ،بنگلہ دیش ،نیپال اور سری لنکا کی ٹیمیں 21 نومبرکو پاکستان آئیں گی۔ ورلڈ بلائنڈ ٹی ٹونٹی کرکٹ کپ 22 نومبر سے 3 دسمبر2024 تک لاہور اور ملتان میں کھیلا جارہا ہے جس کی افتتاحی تقریب22 نومبرکو لاہور میں ہوگی۔ سیمی فائنل  یکم دسمبر جبکہ فائنل3 دسمبرکو کھیلا جائیگا۔