لاہور(نامہ نگار)ڈیفنس سی کے علاقے میں موٹر سائیکل اور ٹریکٹر ٹرالی کے درمیان ٹکر کے نتیجے میں 11 سالہ لڑکا جاں بحق جبکہ اس کا والد،والدہ،بھائی اور دو کمسن بہنیں زخمی ہوگئی ہیں۔ ڈیفنس سی کے علاقے فیز 6میں موٹرسائیکل بے قابو ہو کر ٹریکٹر ٹرالی سے ٹکرا گئی۔ موٹرسائیکل سوار 11 سالہ نصیر افضل موقع پر جاں بحق جبکہ والد افضل، والدہ رمضان بی بی، بھائی 8 سالہ حسیب اور دو بہنیں 9 سالہ ارم رومان اور 4 سالہ ام ہانیہ زخمی ہو گئیں۔پانچوں زخمیوں کو جنرل ہسپتال منتقل کردیا گیا ۔پولیس نے متوفی لڑکے کی نعش پوسٹ مارٹم کیلئے مردہ خانے منتقل کر کے قانونی کارروائی شروع کردی ۔پولیس کا کہنا ہے کہ38 سالہ افضل علی شراب کے نشے میں دھت تھا اور اپنی بیوی اور چاروں بچوں کیساتھ ایک موٹر سائیکل پر سوار ہو کرجا رہا تھا کہ حادثے کا شکار ہوگیا۔