روس کیساتھ تیل خریداری معاہدہ، پاکستانی ریفائنریاں براہ راست خریداری کر سکیں گی

اسلام آباد (آئی این پی) پاکستان نے روس کے ساتھ طویل المدتی تیل خریداری معاہدہ کر لیا ہے جس کے تحت مقامی ریفائنریاں براہ راست تیل خریدیں گی۔ روس سے سستے تیل کی خریداری کے معاملے میں اہم پیش رفت سامنے آئی ہے اور پاکستان کی جانب سے روس کے ساتھ طویل المدتی معاہدہ کرلیا گیا ہے۔ جس کے تحت مقامی ریفائنریاں براہ راست تیل خرید سکیں گی۔ روس پاکستان کو پورٹ پر تیل پہنچا کر دے گا جس کی قیمت60 ڈالر فی بیرل ہوگی جبکہ پہلا کارگو دسمبر میں پہنچے گا۔ وزارت پٹرولیم کے ذرائع کے مطابق معمول کی سپلائی کے بعد حکومتی سطح پر روس کے ساتھ معاہدہ کمرشل بنیادوں پر ہوا۔ ذرائع نے بتایا کہ روس سے کمرشل معاہدے کا پہلا کارگو دسمبر میں پاکستان پہنچے گا جو کہ ایک لاکھ میٹرک ٹن خام تیل پر مشتمل ہوگا۔ کمرشل معاہدے میں جی سیون ممالک کی روسی تیل کی قیمت کی حد کو مدنظر رکھا گیا ہے۔ ذرائع کا کہنا تھا کہ روسی خام تیل کرایہ پریمیم نکال کر بھی عام مارکیٹ سے 10 ڈالر فی بیرل سستا ہے۔ حکام وزارت پیٹرولیم کے مطابق پہلے ٹیسٹ کارگو میں بھی پاکستان کو 4 کروڑ ڈالر کی بچت ہوئی۔