اسلام آباد (خبرنگارخصوصی) جنوبی وزیرستان میں دہشتگردوں کے خلاف کارروائی کے دوران شہادت قبول کرنے والے سپاہی ساجد اعظم شہید کو اس کے آبائی علاقے میں پورے فوجی اعزاز کے ساتھ سپرد خاک کر دیا گیا۔ پاک فوج کے شعبہ تعلقات عامہ (آئی ایس پی آر) کے مطابق ضلع کوٹلی آزاد کشمیر کے رہائشی 31 سالہ ساجد اعظم 16 اکتوبر 2023 جنوبی وزیرستان کے علاقے عسمان منزہ میں دہشتگردوں کے ساتھ جھڑپ میں شہید ہو گئے تھے۔ انہیں آبائی علاقے ضلع کوٹلی میں آبائی قصبہ نکیال، ضلع کوٹلی، آزاد کشمیر میں پورے فوجی اعزاز کے ساتھ سپرد خاک کر دیا گیا۔ نماز جنازہ میں سینئر حاضر سروس فوجی افسران، عزیز و اقارب اور اہل علاقہ نے شرکت کی۔ آئی ایس پی آر کے مطابق پاکستان کی مسلح افواج مادر وطن سے دہشت گردی کی لعنت کو ہر قیمت پر ختم کرنے کے لیے پرعزم ہیں۔