اسلام آباد (نمائندہ خصوصی) وفاقی وزیر تجارت جام کمال خان نے اسلام آباد کیپٹل ٹیریٹری پولیس کے زیر اہتمام ٹیکٹیکل پسٹل شوٹنگ مقابلے 2024 میں دوسری پوزیشن حاصل کی۔ ایونٹ میں مختلف زمروں میں 45 پیشہ ور شوٹرز نے شرکت کی، جنہوں نے انتہائی مسابقتی ماحول میں اپنی صلاحیتوں کا مظاہرہ کیا۔پسٹل شوٹنگ کیٹیگری میں نعمان علی نے پہلی پوزیشن حاصل کی، خرم عادل نے تیسری پوزیشن حاصل کی جبکہ جام کمال خان نے دوسری پوزیشن حاصل کر کے متاثر کیا۔ ایونٹ میں سب مشین گن کی کیٹیگری بھی پیش کی گئی، جہاں عرفان جان نے پہلی، خوشاب خان دوسرے اور زاہد اقبال تیسرے نمبر پر رہے۔ تقریب میں اسسٹنٹ انسپکٹر جنرل (اے آئی جی) پولیس عنایت علی نے بہترین کارکردگی کا مظاہرہ کرنے والوں میں ٹرافیاں، میڈلز اور اسناد تقسیم کیں۔ قابل ذکر بات یہ ہے کہ جام کمال خان کے بیٹے شہزادہ جام محمد خان نے اپنے والد کی جانب سے یہ ایوارڈ وصول کیا۔