لاہور(سپورٹس رپورٹر) اے سی سی مینز ٹی 20 ایمرجنگ ٹیمز ایشیا کپ میں بھارت نے پاکستان کو 7 رنز سے شکست دیدی۔اومان کرکٹ اکیڈمی گرائونڈ میں کھیلے گئے میچ میں بھارت اے نے ٹاس جیت کر 8 وکٹوں پر 183 رنز بنائے تھے۔ابھیشیک شرما 35، پرابھ سمران سنگھ 36 اور تلک ورما 44 رنز کے ساتھ نمایاں رہے۔ سفیان مقیم نے 2 کھلاڑیوں کو آئوٹ کیا۔ جواب میں پاکستان شاہینز 20 اوورز میں سات وکٹوں پر 176 رنز بناسکی۔عرفات منہاس 41‘یاسر خان 33‘قاسم اکرم 27‘عبد الصمد 25رنز بناکر نمایاںرہے۔مین آف دی میچ انشول کمبوج نے تین کھلاڑیوں کوآئوٹ کیا ۔ پاکستان شاہینز ٹیم کل میزبان اومان اور 23 اکتوبر کو متحدہ عرب امارات سے مقابلہ کریگی۔ متحدہ عرب امارات نے اومان کو 4 وکٹوں سے شکست دے دی۔ یو اے ای نے 151 رنز کا ہدف 5 گیندوں قبل ہی حاصل کرلیا۔ مین آف دی میچ سید حیدر 44 رنز بناکر ناقابل شکست رہے۔ تانش سوری 33‘ باسل حمید اور نیلانش کیسوانی نے 19، 19 رنز بناسکے۔ عامر کلیم اور مہران خان نے 2، 2 وکٹیں لیں۔اومان نے8 وکٹوں پر 150 رنز بنائے۔ کپتان جتیندر سنگھ 54 رنز بناکر نمایاں رہے۔ عامر کلیم 32 اور محمد ندیم 20 رنز بناکر نمایاں رہے۔ محمد جواد اللہ اور محمد فاروق نے 3، 3 وکٹیں لیں۔