بانی پی ٹی آئی کو قانون کے مطابق بی کلاس کی تمام سہولتیں میسر ہیں: جیل انتظامیہ

راولپنڈی (نوائے وقت رپورٹ) اڈیالہ جیل انتظامیہ نے بانی پی ٹی آئی کے متعلق پارٹی رہنماؤں کی پریس کانفرنس پر وضاحت جاری کر دی۔ اڈیالہ جیل انتظامیہ نے کہا ہے کہ بانی کو جیل میں قانون کے مطابق بی کلاس کی تمام سہولتیں میسر ہیں۔ بانی کی خوراک، صحت، مطالعہ سمیت ورزش کا خاص خیال رکھا جاتا ہے۔ احاطے میں بجلی کی فراہمی جاری ہے۔ بانی کو اپنا کھانا تیار کرنے کے لئے ایک قیدی کک دیا گیا ہے۔ ناشتہ میں دہی، بسکٹ اور کھجوریں بھی دی جاتی ہیں جبکہ ناشتہ میں کافی، چیہ سیڈ، چقندر کا جوس دیا جاتا ہے۔ بانی روزانہ دو گھنٹے ورزش کرتے ہیں، روزانہ اخبار بھی دیا جاتا ہے۔ بانی پی ٹی آئی کو شام کے کھانے میں دلیہ، ناریل پانی اور انگور وغیرہ دیئے جاتے ہیں۔ بانی کو کسی قسم کی بیماری نہیں وہ مکمل صحت مند ہیں۔ جیل کے ڈاکٹرز بانی کا دن میں تین مرتبہ معائنہ کرتے ہیں۔ بی کلاس میں بانی پی ٹی آئی کی سکیورٹی کے تمام انتظامات مکمل ہیں۔ بانی سے متعلق پھیلائی جانے والی خبروں میں کوئی صداقت نہیں۔