یحییٰ سنوار کی ساری زندگی اسرائیلی جارحیت کا مقابلہ کرتے گزری، شبیر میثمی

 اسلام آباد (خبرنگار)شیعہ علماء کونسل پاکستان کے مرکزی سیکرٹری جنرل علامہ ڈاکٹر شبیر حسن میثمی نے حماس کے سربراہ یحییٰ سنوار کی شہادت کو عظیم نقصان اور المیہ قرار دیتے ہوئے اس پر گہرے دکھ کا اظہار کیا ہے اور کہا ہے کہ یحییٰ سنوار ایک سچے اور عظیم مبارز و مجاہد تھے جن کی ساری زندگی اسرائیلی جارحیت کا مقابلہ کرتے ہوئے گزری، جو خطرے کے سامنے ڈٹ کر کھڑے رہے اور ذرا برابر لرزش نہ دکھائی، آپ اپنی آخری سانس تک ہمت و شجاعت کا عملی مظاہرہ کرتے رہے، میدان جنگ میں گولیوں کی بوچھار میں آپ سینہ تان کر غیر متزلزل عزم کے ساتھ سامنا کرتے، یحییٰ سنوار روئے زمین پر سب سے بدترین ظالم، مکار اور بے رحم دشمن کے خلاف لڑتے ہوئے راہ خدا میں شہید ہو گئے، اپنے لوگوں کی حفاظت اور اس کے مقصد کو برقرار رکھنے کے لیے اپنا سب کچھ دے دیا، ان کی بہادری، قربانی اور جنگ کے لیے غیر متزلزل عزم کو کبھی فراموش نہیں کیا جائے گا