کراچی( اسپورٹس رپورٹر) انگلینڈ کیخلاف ٹی ٹونٹی سیریز میں شامل ہونے والے پاکستان کرکٹ ٹیم کے لیگ سپنر ابرار احمد نے کہا کہ ٹیم میں شامل ہونے کی خوشی بہت زیادہ ہے جسے بیان نہیں کیا جا سکتا، انگلینڈ جیسی ٹیم کے خلاف ٹیم میں نام آنا بڑی بات ہے، بڑی سیریز کے لیے قومی ٹیم میں نام آنے کی خوشی الگ ہے۔ ابرار احمد نے کہا کہ کیمپ میں ثقلین مشتاق سے بہت کچھ سیکھنے کا موقع ملے گا، عثمان قادر اور ثقلین مشتاق سے بھی رہنمائی حاصل کی ہے۔پاکستان کرکٹ ٹیم کے لیگ سپنر نے کہا کہ ٹیم میں نام آیا تو میں سو رہا تھا، دوستوں نے فون کر کے بتایا تمہارانام پاکستان ٹیم میں آگیا ہے، جس کا سن کر بہت خوشی ہوئی اس کے بعد میں نے اپنے والد اور والدہ کو فون کر کے بتایا، وہ دونوں بھی بہت خوش ہوئے۔
بنگلہ دیشی فاسٹ بائولر روبیل حسین نے ٹیسٹ کرکٹ سے کنارہ کشی اختیار کرلی
کراچی( سپورٹس ڈیسک) بنگلہ دیش کے فاسٹ بائولر روبیل حسین نے ٹیسٹ کرکٹ سے کنارہ کشی اختیار کرلی۔غیر ملکی میڈیا رپورٹ کے مطابق بنگلہ دیشی فاسٹ بولر نے ریڈ بال کرکٹ سے ریٹائرمنٹ کا فیصلہ کیا ہے، روبیل حسین نے بتایا کہ نوجوانوں کو موقع دینے کیلئے یہ فیصلہ کیا۔انہوں نے کہا کہ نوجوانوں کو موقع ملے گا تو فاسٹ بولنگ مزید مضبوط ہوگی، اپنے ملک کے لیے 27 ٹیسٹ کھیلنا بڑے اعزاز کی بات ہے۔روبیل حسین کا کہنا تھا کہ پانچ روزہ کرکٹ میں ساتھ دینے والوں کا شکریہ ادا کرتا ہوں۔، مجھے لگتا ہے کہ ابھی میں ون ڈے اور ٹی ٹوئنٹی میں ملک کے لیے کچھ کر سکتا ہوں۔
بنگلہ دیشی فاسٹ بولر کا کہنا تھا کہ وائٹ بال کرکٹ کے لیے ڈھاکا پریمئیر لیگ اور بنگلہ دیش پریمئیر لیگ کھیلتا رہوں گا۔روبیل حسین نے 27 ٹیسٹ میچز میں 36 وکٹیں حاصل کررکھی ہیں، جس میں ایک بار 5 وکٹیں حاصل کرنا بھی شامل ہے، ان کا اکانومی ریٹ 3.92، اسٹرائیک ریٹ 117.3 تھا۔