ملتان ( خبر نگار خصوصی)ملتان ویسٹ منیجمنٹ کمپنی نے گندگی والا کنٹینر، گورنمنٹ گرلز کمپری ہینسو سکول و کالج کی دیوار کے ساتھ رکھ دیا ارد گرد کے ہوٹل مالکان اور دکانداروں کی طرف سے کوڑا پھینکنے سے کنٹینر کوڑے کا ڈھیر بن گیا،ٹیچرز، طالبات بیمار ہونے لگ گئیں۔ذرائع کاکہنا ہے کہ سکول و کالج کی انتظامیہ نے بارہا ملتان ویسٹ منیجمنٹ کمپنی کے اعلیٰ افسران کو آگاہ کیا ہے لیکن ماتحت عملہ کی ہوٹل مالکان سے ملی بھگت ہونیکی وجہ سے کوئی شنوائی نہ ہورہی ہے۔عوامی وسماجی حلقوں نے کمشنر،ڈپٹی کمشنر اور اے سی سٹی سے مطالبہ کیا وہ ویسٹ منیجمنٹ کمپنی کے افسران کو ہدایت جاری کریں کہ گند سے بھرا کوڑے کے کنٹینر کو سکول و کالج کی حدود سے اٹھا کر کہیں دور رکھا جائے ۔ تاہم ترجمان کا کہنا ہے کہ اس علاقے میں کنٹینر رکھنے کی جگہ نہیں ہے جہاں پر رکھتے ہیں وہاں کے رہائشی اعتراض کردیتے ہیں لیکن اس معاملے کو دوبارہ چیک کر کے اس کا حل نکالتے ہیں۔