بہاولپور (نامہ نگار)  چولستان کے علاقے  میں داخل ہونے والے  چیتے کو   مقامی لوگوں نے  گھیرے میں لے لیا اور ڈنڈوں سوٹوں سے زخمی کر دیا۔ تفصیلات کے مطابق گزشتہ روز ایک چیتا چولستان کے علاقے 73 ڈی بی میں گھس آیا جس نے مبینہ طورپر حملہ کرکے سیہون شاہ اور اللہ رکھا کو زخمی کر دیا اور گندم کی  فصل میں گھس گیا۔ علاقے کے لوگوں نے چیتے کو گھیرے میں لیکر ڈنڈوں اور سوٹوں سے اسے زخمی کر دیا۔ اطلاع ملتے ہی اسسٹنٹ  ڈائریکٹر پروٹیکشن فورس وائلڈ لائف بہاولپور عرفان  فاروقی‘ ڈسٹرکٹ وائلڈ لائف آفیسر بہاولپور مجاہد کلیم اور دیگر عملہ موقع پر پہنچ گئے اور مبینہ طورپر انہوں نے زخمی چیتے کو فرسٹ ایڈ دی۔ اسی دوران زخمی چیتے نے وائلڈ لائف کے ڈرائیور نعیم عباسی کو بھی زخمی کردیا۔ بتایا جاتا ہے زخمی چیتا زخموں کی تاب نہ لاکر دم توڑ گیا۔