تبوک گورنری نے پہاڑی علاقے میں پھنسے نوجوان کو نکالنے کی ویڈیو جاری کردی، طبی امداد دی جا رہی ہے،ہلال احمر
سعودی عرب کے علاقے تبوک میں راکا مرکز کےقریب پہاڑی چوٹیوں میں پھنسے ایک نوجوان کو بچالیا گیا۔عرب ٹی وی کے مطابق ابو راکا مرکز کے قریب دو پہاڑوں کے درمیان ایک غار میں پھنسے سعودی نوجوان کو شہری دفاعی کی ٹیموں نے ہیلی کاپٹر کی مدد سے نکالا جس کے بعد اسے اسپتال منتقل کردیا گیا ہے۔ پہاڑی چوٹی میں پھنسے نوجوان کی حالت خطرے سے باہر ہے۔اس واقعے کی ایک ویڈیو بھی سوشل میڈیا پروائرل ہوئی جس میں نوجوان کو دو پہاڑوں کے بیچ ایک غار میں پھنسے دیکھا جاسکتا ہے۔ایک عینی شاہد نے بتایا کہ نوجوان گذشتہ روز دن گیارہ بجے سے پھنسا ہوا تھا۔ اسے بچانے کے لیے شہری دفاع، ابو راکا بلدیہ کے اہلکاروں، ہلال احمر کی ٹیم اور رضا کاروں نے بھی حصہ لیا۔دوسری طرف تبوک گورنری نے پہاڑی علاقے میں پھنسے نوجوان کو نکالنے کی ویڈیو جاری کی ہے اور کہا ہے کہ اسے طبی امداد دی جا رہی ہے۔