شاعر ِ مشرق‘ حکیم الامت علامہ محمداقبال
ُ تُو جاں فِدائے رسولِ اکرمؐ ‘ تُو قصرِ ملّت کا پاس باں تھا
جمال بخشِ بہارِ عرفاں ‘ تُو ‘ علم و حکمت کا آسماں تھا
٭٭٭
سفیرِ عشقِ رسولﷺ تھا تُو ‘ مَہکتا ‘ ملّت کا پھول تھا تُو
تُو ایک شعلہ بہ جاں حُدی خواں ‘ کمال ‘ تُو ‘ میرِ کارواں تھا
٭٭٭
تُو ‘ اِک قلندر ‘ فقیرِ کامل ‘ وفا کا ساحل ‘ چراغِ منزل
تُو ‘ ایک آتش نوا تھا شاعر ‘ حکیمِ امّت تھا ‘ باغ باں تھا
٭٭٭
تھی ‘ تیرے پیشِ نظر ہمیشہ ہی خود شناسی ‘ خدا شناسی
قصیدہ گو تھا اگر ــ’خودی‘ کا تو ’بے خودی‘کا بھی نغمہ خواں تھا
٭٭٭
ہمیشہ ‘ حُسنِ عمل کا داعی ‘ ’’حیاتِ جاوید‘‘ کا مؤیَّد
تُو ‘ آشنائے اُمورِ ’کُن‘ تھا ‘ تُو ‘ دِیدہ وَر تھا ‘ تُو ‘ نکتہ داں تھا
٭٭٭
ہلالِ مشرق ! تِری اذانِ سحر نے ‘ فِکری جمود توڑا
نقیبِ احیائے قومِ فاراں ! تُو ‘ ولولوں کا نیا جہاں تھا
٭٭٭
تِرے جلالِ قلم نے کُنجشکِّ پَر شِکَستہ کو پَر لگائے
تو چرخِ گردانِ بے کراں میں ہی تیرے شاہیں کا آشیاں تھا
٭٭٭
تِرے فُغانِ سحر نے بخشا ‘ دمِ غزالیؔ و سوزِ رومیؔ
تُو ‘ ’بالِ جبرِیل‘ رُوحِ مشرق ‘ تُو ‘ خُسروِ بزمِ عارفاں تھا
٭٭٭
بتایا ’’بانگِ درا‘‘ نے ہم کو ‘ غلامی کتنی بُری بلا ہے !
’پیامِ مشرق‘نے راز کھولا ‘ تُو ‘ حُرّیت کا ہی نغمہ خواں تھا
٭٭٭
اُبلتا طوفان ‘ بپھری موجیں ‘ شِکَستہ نائو ‘ حواس مختل
تُو ‘ ایسے لمحاتِ آزمائش میں ناخدا تھا ‘ تُو ‘ بادباں تھا
٭٭٭
کمالِ عزم و یقیں سے تیرے ‘ عروقِ مُردہ میں جان آئی
اَے شہریارِ شعورِ مشرق ! یہ تیرا اعجازِ جاوداں تھا
٭٭٭
حرَم کے پیرانِ مصلحت بیں کی ’پست فِکری‘ پہ تھا فسردہ
ہماری ‘ یکتا مثال ‘ گم گشتہ عظمتوں پر ‘ تُو ‘ نوحہ خواں تھا
٭٭٭
تِری زباں نے ‘ تِرے عمل نے ‘ تِرے قلم نے کِیا ہے ثابت
کہ تُو ’محمد‘ ، ’علی‘کے مکتب کا ایک جاں تاب ارمُغاں تھا
٭٭٭
’جلالِ حیدرؒ ‘ ’ادائے شبّیر‘ ، ’’فقرُ فخری‘ کا تُو ‘ پیَمبر
تُو ‘ سیفِ مسقُول ‘ ضربِ حق تھا ‘ تُو ‘ استقامت کا آسماں تھا
٭٭٭
تِرے جہادِ عمل میں شامل تھے ‘ درد ‘ ملّت کا رکھنے والے
تُو ‘ ہَم صفیرِ’امیرِ ملّت‘ ، ’عظیم قائد‘ کا ہم زباں تھا
٭٭٭
سلام ! تُو نے جگر کے خُوں سے ‘ چراغِ ملّت کی لَو بڑھائی
قسیمِ احساسِ دردِ ملّت ‘حصارِ شب میں سحرنشاں تھا
٭٭٭
ہے یاد ! زاغوں کے جب تصرّف میں تھے عُقابوں کے سب نشیمن
حصارِ مشرق ! تُو ‘ برق و باراں کی اُس گھڑی میں بھی سائباں تھا
٭٭٭
تِری بدولت ‘ ہزار آنکھوں نے دیکھے ‘ تا بہ فلک‘ اُجالے
اَے میرے اقبال ! تیرے نجمِ سخن سے برّاق ‘ آسماں تھا
٭٭٭
تِرے قلم نے عطا کِیا ہے ‘ شِکَستہ پا کو بھی شوقِ منزِل
زمانہ ‘ جمشیدؔ ‘ مانتا ہے ‘ تُو ‘ عزم و ہمّت کاآسماں تھا !
جمشیدؔ کمبوہ (پاک پتن شریف)