کراٹے کامبیٹ ‘ پاکستان نے بھارت کو 1-2 سے شکست دیدی

لاہور(سپورٹس رپورٹر)متحدہ عرب امارات کے شہر دبئی میں ہونے والے کراٹے کامبیٹ مقابلوں میں پاکستان نے بھارت کو 1-2 سے شکست دیدی۔ کراٹے کومبیٹ 45 میں پاکستان‘ بھارت مقابلے کیلئے پہلی فائٹ پاکستان کے رضوان علی اور بھارت کے پوون گپتا کے درمیان ہوئی جس میں پاکستانی فائٹر نے حریف کو ابتدا ہی میں ناک آؤٹ کردیا۔دوسری فائٹ کیلئے ہمانشو کوشک سے مقابلہ کیلئے علومی کریم کی جگہ فیضان خان ایرینا میں آئے۔ علومی کریم ویٹ برابر نہ ہونے کی وجہ سے فائٹ میں شرکت سے محروم رہے۔فیضان نے بھارتی حریف سے مقابلہ تو خوب کیا لیکن وہ اس کو زیر کرنے میں ناکام رہے یوں مقابلہ ایک ایک سے برابر ہوگیا۔ فیصلہ کن معرکے کیلئے پاکستان کے کپتان شاہ زیب رند اور بھارت کے رانا سنگھ میدان میں اترے۔شاہ زیب نے فائٹ کے آغاز میں ہی رانا سنگھ پر پے درپے وار کیے اور انہیں اتنا بے بس کردیا کہ وہ ایک کونے میں دبک گئے اور کافی دیر اٹھ نہ سکے ۔بھارتی فائٹر شاہ زیب کے خلاف ٹیکنیکل ناک آؤٹ قرار پائے۔ پاکستان نے معرکہ 1-2 سے جیت لیا۔ فائٹ کے بعد شاہ زیب رند نے اظہار خیال میں امن کا پیغام دیتے ہوئے پاکستان اور بھارت کا جھنڈا اٹھایا اور کہا کہ وہ امن کا پیغام دینا چاہتے ہیں۔