آذربائیجان کے دارالحکومت باکو میں جاری ورلڈ شوٹنگ چیمپئن شپ میں پاکستان سے تعلق رکھنے والی کشمالہ طلعت نے خواتین کی 25 میٹر پسٹل کیٹیگری میں نیا قومی ریکارڈ بنادیا۔
25 میٹر ائرپسٹل کے مقابلے 2روز تک جاری رہے، جس میں کشمالہ طلعت نے پہلے روز 290 اور دوسرے روز مزید 293 پوائنٹس حاصل کرکے مجموعی طور پر 583 پوائنٹس بنائے۔
واضح رہے کہ اس سے قبل کشمالہ طلعت نے اس سال ہونے والے نیشنل گیمز میں 582 پوائنٹس اسکور کئے تھے۔ وہ ایک پوائنٹ کی کمی کے باعث فائنل راؤنڈ تک رسائی حاصل نہیں کرسکی تھیں اور نویں پوزیشن حاصل کی تھی۔
پاکستان کی کشمالہ اور بھارت کی ردھم شنگھوان کے درمیان مقابلہ 583 پوائنٹس پر برابر تھا .لیکن بھارتی شوٹر کے سینٹر آف ٹارگٹ 23 شاٹس تھے اور کشمالہ کے سینٹر شاٹس 19 تھے، جس بنیاد پر بھارتی کھلاڑی نے آٹھویں پوزیشن حاصل کرلی تھی۔