پاکستان، بنگلہ دیش کے درمیان پہلا ٹیسٹ میچ آج سے شروع، ٹرافی کی رونمائی، مخالف ٹیم کمزور نہیں: شان مسعود

لاہور(سپورٹس رپورٹر)پاکستان اور بنگلہ دیش کے درمیان 2ٹیسٹ میچز پر مشتمل سیریز کا پہلا ٹیسٹ میچ آج سے شروع ہو گا،دونوں ٹیموں کے کھلاڑیوں نے آپشنل ٹریننگ سیشن میں حصہ لیا۔ پاکستان اور بنگلہ دیش کی ٹیمیں 13ٹیسٹ میچز میں ایک دوسرے کے مدمقابل آئیں ، گرین شرٹس نے 12ٹیسٹ میں کامیابی سمیٹی جبکہ ایک ٹیسٹ ڈرا ہوا۔ ٹاس ساڑھے نو بجے اور میچ کا آغاز صبح دس بجے ہوگا۔ٹیسٹ سیریز کیلئے ٹرافی کی رونمائی کردی گئی۔راولپنڈی سٹیڈیم میں پاکستانی ٹیم کے کپتان شان مسعود اور بنگلہ دیشی کپتان نجم الحسین شانتو نے ٹرافی کی رونمائی کی تقریب میں شرکت کی۔دونوں کپتانوں نے ٹرافی کے ہمراہ راولپنڈی سٹیڈیم اور دامنِ کوہ میں ٹرافی کے ہمراہ تصویر بنوائی۔قومی ٹیسٹ ٹیم کے کپتان شان مسعود نے کہا ہے کہ ہمارے پاس مضبوط فاسٹ باؤلنگ لائن اپ ہے، مخالف ٹیم کوکمزور نہیں سمجھتے۔راولپنڈی میں پریس کانفرنس کرتے ہوئے ان کا کہنا تھا کہ کوشش کریں گے کہ ٹیسٹ سیریز اپنے نام کریں اور بنگلہ دیش کیخلاف جارحانہ کرکٹ کھیلیں۔ ہمیں اپنی کارکردگی پر توجہ مرکوز رکھنے کی ضرورت ہے، امام الحق ہمارے سسٹم کا حصہ ہیں، انہیں اس سیریز میں آرام کروایا گیا ہے۔ محمد حریرہ پچھلے 3، 4 سال سے ڈومیسٹک میں پرفارم کر رہے ہیں، محمد حریرہ کو سکواڈ میں شامل کرکے ان کا پوٹینشل دیکھنا ہے، ۔ صائم ایوب نے آسٹریلیا کیخلاف آخری ٹیسٹ میں اپنی صلاحیتوں کی جھلک دکھائی، ہم انہیں پورا چانس دینا چاہتے ہیں۔ آسٹریلیا میں بدقسمتی سے جیت نہ سکے لیکن کرکٹ اچھی کھیلی۔ ورلڈ ٹیسٹ چیمپئن شپ میں کمزور حریف جیسی کوئی چیز نہیں، کوشش کریں گے کہ بنگلہ دیش ٹیم کیخلاف جارحانہ کرکٹ کھیلیں۔آپ کو ایک ٹیسٹ ٹیم کے طور پر مختلف کنڈیشنز میں کھیلنا ہوتا ہے، مجھے ایسا محسوس ہوتا ہے کہ جب بھی ہم نے راولپنڈی میں ڈومیسٹک کرکٹ کھیلی ہے تو کنڈیشنز نے سپنرز کے بجائے فاسٹ باؤلرز اور بیٹرز کا ساتھ دیا ہے۔ ہمارے پاس مختلف کوچز ہیں اور ان کا مائنڈسیٹ کلچر مختلف ہے لیکن ہمیں خود کو اور اپنی ٹیم کو بھی دیکھنا ہے کہ ہم بطور ٹیم کہاں پر پہنچنا چاہتے ہیں۔ پاکستان کی فاسٹ باؤلنگ مضبوط ہے، ہمارے پاس 6 بہترین فاسٹ باؤلرز ہیں اور ٹیسٹ کرکٹ میں آپ کو میچ جیتنے کیلئے 20 وکٹیں لینی ہوتی ہیں۔ٹیم کامبینیشن کے حوالے سے کہا کہ ہمیں اس وقت ورلڈ ٹیسٹ چیمپئن شپ کو دیکھنا ہے، اس وقت جو ہماری پوزیشن ہے اور جو ہوم میچز ہیں ہمیں کم از کم ان کو جیتنا ہے۔ محمد علی پی ایس ایل میں ایک سرپرائز پیکچ کے طور پر نظر آئے تھے لیکن ہم سب نے ان کی باؤلنگ کو کافی عرصے سے دیکھا ہوا ہے اور کنڈیشنز کو دیکھتے ہوئے ہم نے ان کا انتخاب کیا ہے۔ ہمارا دھیان ورلڈ ٹیسٹ چیمپئن شپ پر ہے اور ہم چاہتے ہیں کہ ہم فائنل جیتیں لیکن فائنل جیتنے کیلئے ہوم میچز جیتنے ہوں گے۔ بنگلہ دیش کی ٹیم میں کافی تجربہ کار کھلاڑی شامل ہیں اور ان کے پاس کئی ایسے کھلاڑی ہیں جو باصلاحیت ہیں اور بنگلہ دیش ایک ایسی ٹیم ہے جو درست سمت میں جا رہی ہے۔ شائقین ہمیشہ چاہتے ہیں کہ کرکٹ ٹیم اچھی کارکردگی کا مظاہرہ کرے اور ان کیلئے میچ جیتے۔ ہم سیریز اور آنیوالے سیزن کیلئے پرجوش ہیں۔ ہمارے پاس کرکٹرز کا ایک باصلاحیت گروپ ہے جو سیریز میں اچھی کارکردگی دکھانے کیلئے بے چین ہے۔سیریزسے قبل کچھ اچھے ٹریننگ سیشن ہوئے اور کوچنگ سٹاف نے کھلاڑیوں کیساتھ سخت محنت کی۔