اسلام آباد (نمائندہ خصوصی)ایف بی آرمیں اثرورسوخ کے ذریعے من پسند پوسٹنگز لینے کے طرز عمل کا چیئرمین ایف بی ار نے نوٹس لے لیا۔ چیئرمین ایف بی آر نے ایف بی ار کے تمام اراکین، چیف کلیکٹرز اور ڈی جیز کسٹمز کے ساتھ ساتھ تمام چیف کمشنرز اور ڈی جیز ان لینڈ ریونیوز کو بھی مراسلہ بھیج دیا،مراسلے میں کہا گیا کہ مڈ کیریئر افسران نیٹ ورک کے ذریعے فیلڈ میں من پسند پوسٹنگز کا حصول کر رہے ہیں اور ایف بی آر میں یہ کلچر ادارے کی خودمختاری کو ختم کر رہا ہے۔اس حوالے سے کہا گیا کہ من پسند پوسٹنگز کے لیے اثرورسوخ کا استعمال مس کنڈکٹ کے زمرے میں آتا ہے جس پر افسران کو ملازمت سے برطرف کیا جا سکتا ہے۔مراسلے میں کہا گیا کہ مستقبل میں من پسند پوسٹنگز کے لیے اثرورسوخ کے استعمال میں ملوث افسران فوری معطل ہوں گے اور ان کے خلاف تادیبی کارروائی عمل میں لائی جائے گی۔