لاہور (نامہ نگار) فیکٹری ایریا میں چھت پر پڑی ڈور کھینچتے بجلی کی تاروں سے کرنٹ لگنے سے ایک بہن جھلس کر جاں بحق جبکہ دو بہنیں شدید زخمی ہو گئیں۔ تفصیلات کے مطابق فیکٹری ایریا کے علاقے گلبہار کالونی کی تین بہنیں 22 سالہ فرحت، 20 سالہ کومل اور 14سالہ ناز گھر کی چھت پر کپڑے ڈال رہی تھیں چھت پر کٹی پتنگ کی ڈور پڑی دیکھ کر اسے کھینچنے لگیں۔ ڈور گھر کی چھت کے اوپر سے گزرنے والی بجلی کی ہائی ٹینشن تاروں سے لٹک رہی تھی۔ ڈور کھینچتے ہی تاریں ٹکرانے سے دھماکہ ہوا آگ کے شعلے نکلے، کرنٹ لگنے سے تینوں بہنیں جھلس کر شدید زخمی ہو گئیں۔ تینوں زخمی بہنوں کو طبی امداد کیلئے ہسپتال منتقل کیا گیا۔ جہاں 22 سالہ فرحت زخموں کی تاب نہ لاتے دم توڑ گئی زخمی کومل اور ناز کا علاج جاری ہے۔ پولیس نے فرحت کی نعش پوسٹ مارٹم کے لئے لئے مردہ خانے منتقل کر دی۔