ایرانی جوہری پلانٹ میں دھماکہ‘  نیوز ایجنسی: مشقیں کیں‘ حکام

تہران (انٹر نیشنل ڈیسک) ایران کے بندرگاہی شہر بوشہر میں واقع جوہری پلانٹ میں دھماکے سے ملتی جلتی زوردار آواز سے آس پاس کا علاقہ گونج اْٹھا جب کہ عالمی قوتوں نے بھی تشویش کا اظہار کیا تاہم ایران نے وضاحت کی ہے یہ آواز دفاعی فضائی مشقوں کے باعث پیدا ہوئی۔ عالمی خبر رساں ادارے کے مطابق ایران کے جوہری پلانٹ میں زوردار آواز نے عالمی قوتوں کو تشویش میں مبتلا کردیا تھا تاہم ایران نے وضاحت دی ہے کہ یہ آواز پلانٹ کے نزدیک کی جانے والی فضائی دفاعی مشقوں کی تھی۔ ایران نے ساحلی شہر بوشہر اور جنوب میں خلیج فارس کے کچھ حصوں میں زمین سے فضا میں مار کرنے والے میزائلوں کے تجربے کے لیے بھی یہ مشقیں کیں۔ ان مشقوں کا مقصد جوہری پلانٹ کی مامور فضائی دفاعی نظام کو چیک کرنا تھا۔