ہولی فیملی کیتھولک چرچ میں کرسمس کیرول گلیکسی کا انعقاد،میوزیکل نائٹ

راولپنڈی (جنرل رپورٹر)ملک بھر میں مسیحی برادری کرسمس کا جشن جوش و خروش سے منا رہی ہے ،ایسے میں جڑواں شہروں میں بھی مختلف تقریبات کا پرجوش انعقاد جاری ہے ،اس سلسلے میں گذشتہ روز ہولی فیملی کیتھولک چرچ راولپنڈی میں چوبیسویں کرسمس کیرول گلیکسی کا انعقاد کیا گیا ،کیرول گلیکسی کے مہمان خصوصی پیرش پریسٹ ریورنڈ فادر سرفراز سائمن تھے،مسیحی تقریب کے منتظم و انچارج ہولی فیملی کیتھولک چرچ بابو ساجد امین کھوکھر نے بتایاکہ تقریب میں میوزیکل نائٹ کا اہتمام کیا گیا جبکہ بچوں کے مابین مختلف گیمز کا انعقاد بھی کیا گیا اور دیگر تفریح کا بھی خصوصی اہتمام کیا گیا تھا ،انہوں نے بتایاکہ مسیحی پروگرام ہولی فیملی گروپ کے سٹیفن شوکت ، لیویسن امین ،وقاص  کھوکھر اور دیگر ممبران کی معاونت سے منعقد کیاگیا ،کرسمس کیرول گلیکسی کے موقع پر امن و سلامتی کے پرچار کا درس دیا گیا اور ملکی ترقی ،سلامتی اور امن و امان کے لیے خصوصی دعائیں بھی کی گئیں ۔