راولپنڈی (نوائے وقت رپورٹ)  پی ٹی آئی رہنما بیرسٹر گوہر خان نے کہا ہے کہ کمشنر راولپنڈی اور ان کے خاندان کو مکمل سکیورٹی دی جائے۔ دھاندلی ہونے پر چیف الیکشن کمشنر فوری استعفی دیں۔ بانی پی ٹی آئی سے جیل میں ملاقات کے بعد میڈیا سے گفتگو میں انہوں نے کہا کہ بانی پی ٹی آئی سے تفصیلی ملاقات ہوئی ہے۔ ہمارا سنی اتحاد کونسل کے ساتھ ہمارا جو معاہدہ ہوا اس پر بانی پی ٹی آئی کو آگاہ کردیا ہے اور  ہم نے پچاس ایم این ایز کی فہرست الیکشن کمیشن کو ارسال کردی ہے۔ تمام فہرست سنی اتحاد کونسل کے نام سے جمع کرائی ہے۔ ہمارے جو ایم این ایز سنی اتحاد کونسل کو جوائن کریں گے اسی حساب سے ہمیں خصوصی نشستیں ملیں گی۔ الیکشن کمیشن سے ہمیشہ صاف و شفاف الیکشن کی استدعا کرتے رہے مگر الیکشن کمیشن اپنی ذمہ داری نبھانے میں ناکام رہا۔ ہمارا مطالبہ ہے کہ نتائج فارم 45 کے تحت جاری کیے جائیں۔ بانی پی ٹی آئی کی ہدایات کی روشنی میں ہم چیف الیکشن کمشنر سے استعفے کا مطالبہ کرتے ہیں۔ چیف الیکشن کمیشن سکندر سلطان راجہ کو فی الفور مستعفی ہونا چاہیے۔ صحیح نتائج عوامی مینڈیٹ کے تحت جاری ہونا چاہئیں۔ کمشنر راولپنڈی نے واضح طور پر بتایا ہے کہ کس قسم کی دھاندلی ہوئی ہے۔ اگر فارم 45 کے تحت نتائج جاری نہیں کیے جاتے تو اس سے آئی ایم ایف کا پروگرام متاثر ہوگا۔ ہم نے ایم ڈبلیو ایم کو سپورٹ کیا ہے، وہ مرکز میں ہمارے ساتھ بیٹھے گی۔ سنی اتحاد کونسل سے چونکہ ہم صوبے میں بھی انگیج ہیں لہذا مرکز میں بھی اسی جماعت کے ساتھ اتحاد ہوا ہے۔ چیف الیکشن کمشنر متنازعہ ہو چکے ہیں۔ الیکشن کمشن آئینی ذمہ داری نبھانے میں ناکام رہا۔ چیف الیکشن کمشنر کا کوئی حق نہیں بنتا وہ عہدے پر رہیں۔ بیرسٹر گوہر علی نے کہا کہ فارم 45 الیکشن کمشن کی ذمہ داری ہے۔ پی ٹی آئی قومی اسمبلی کی ایک سو اسی سیٹوں پر جیت چکی ہے۔ امید کرتے ہیں کہ الیکشن کمشن ہمیں مخصوص نشستیں دے گا۔